1 Artakhere tao" zaung shid' xe zin , Nisain lho" khye' re sabyi' qang: yao" qhid' kheim: jo; jo; ru ngo yu mung: jhaung zug:2 re vhe' jhaug' ru , – Lai: lo va" yo, ngo yao" qhid' kheim: myo, nho sham: ru maqhu" qu" ru mung: jhaung zug: wa nao qao" na gau ni" myo, khung: pe" mung: sham: ra". Ai wa nhag' kaug' ra" ave, ngaid: ra" ga: ngo re ta" ru mung: ngo gyai gyaug; pye'3 va". – Alao" ngo jhaung zug: re jhaung zug: kao bo myo, myi: shao: wo". Nga" phug' pho" qe: lab jo; ra" vomo" wa cae: jhug tag boe" jo, mung: vokham: mo" jham re: gyoe; qeim: pye' va" mathao: yang ngo myo, khung: masham lo: khoru: ba: qo" na nae"4 ein: mho: . – Jhaung zug: wa nao pe" mho' nug: ga: myid' re ngo wa tho' zhao" myhao5 mae" Mo"so jhao" mho' ru , – Ai ru: mung: ngo wa jhaung zug: re jhaung zug: myid vang" ru we' ni" jeim ngo ni" qhid' kheim: myo, nho qo" ngaid: re wa phug' pho" qe: lab re dam: nyhang" caung tae: nae" tau: ai: vo , Yuda mang: khyo ngo re dam: nhao6 la, wo" ein: zhao: kyo". – Alao" jhaung zug: wa nao kho myhao" myao" yang: khonhae" dam: qo" li" nae" ga: dam: myid' ra". Jhaung zug: myhi" re: yao: we' daga" zaung: jo; ra". Yao: nhag' thaung: yang: ngo re peim" ke' mung: ngo yao: we' ba7 na tau" ka" to: va". – Dam: ngo wa jhaung zug: myid vang" ngaid: re wa qid lao ba vao shaid' ug: ra" mang: zug: qe Yuda mang: joe" sho' ngo re lhai: ke' nae" akhang" byid:8 tung" khye' we' , – Jhaung zug' sag' yo mo" ug: ra" Asab wa Mo"so: yham we' tin" ra" gyegai" kham: zang rere: , vokham" tau: mae" re: , nga" yham tau: mae" re: , sag' vo: byid: nae" akhang" tung" khye' byid' ke' la, ein: jhaung zug: jhao" mho' va". Jhaung zug: khyo" re: nga" adao mae na: ra" nga" Mo"so: jeju mathao: yang akhang" byid: tung" khye' byid' ke' ra".9 Ai ru: mung: qid lao bavao shaid' ug: ra" mang: zug: qere ngo vao yang: jhaung zug' akhang" tung" khye' yao bam re paui: qhu" va". Jhaung zug: re: ngo we' daga" sin: thu qe we' myao: jui" ra" sin: zo: qere10 bonhao: ke' ra". – Israel zo: myid: qe re caung gam: yu nae" ga: byu dayaug li" ra" khyo Horoni byu Sanbalad' jeim ngaid: ra" Amon byu Tobia the' gyo: lao" yao: tao gyai myid magyo" pyo: lo: ko".11 Ngo Yerusalem joe" mung: sam ba na12 yang: , – Ngo mae bocao ko" mo, damyo" we' daga" myi" re to" bam va". Ai qere: Yerusalem tau: kaid' nae" ga: nga" Mo"so wa ngo re khoru: juyi byid' ru , ngo khag' re lao" mata" kyo: . Ngo jui" ra" myao: mae" je13 yang: zai tho: ra" gug' nyhug' mabo. – Myi" ayo, kham: dung: khyo" thug' mung: mao jaung: qid thaung: we' fope' sham" pye' ra" kham: dung: joe" sho' gyoe; myi" pye' va" vokham" jham we' ai: tau nga" pye' kham:14 dung: jham re ye qu" na: . – Qid baug; kham: we' jhaung zug: qid lhao: lai sho' ngo su" kam" qu" re ngo jhui" ra" myao: su: nae"15 khyo mabung". – Dam: ai: myi re vokham" jham qu" zo" ai: lao: khaung: khyo gau: su: mung: dam: tug' yang: dau" te' kham:16 dung: khyo" lhang: vao lo: . – Mang: zug: jham wa ngo khai: ye" ru , pe" kaid' ru , pe" kaid' nae" ru maba ko". Yuda byu qe , khin jaung qe , ham" hung: bo mo, we' khaung: mhao: qere pe" re: mata" thug' shi: .17 Ai: thao ngo yao: bam re ngonhaung" phau" ra" sho: jhin , Yerusalem cae: jhug' tag boe" jo; ru we' kham: dung: jham nga" byi: pye' ru re naonhaung" the' myao veko". Li" geri: thao phyao: nyhao: nhaung" pyam" yhin" ru maphau: lo: veshao: Yeru- salem vokham jham re tau: yhe' gelang:18 ein: yao: bam re ta" hau" ke' zo". – Ngo re jeju ceim" shid' ra" nga" Mo"so akhyo rere: , jhaung zug: ngo re ta" kyo" ra" dao: kheim: re re: , ngo yao: bam re zhao: kyo: va". Alao" yao: bam wa ngonhaung" to" gelang: . Ai mung: vomo" dam: te: gelang: se, ga: ceim" ta" mung: ai: mau" gai: ru19 kaid' nae" tau: yao: bam phin" ako". – Ai: lau dao: Horon byu Sambalad , jeim ngaid: ra" Amon byu Tabia we' Arabi byu Geshem bam the' gyo: lao" yao: bam qi: jung" pye' zo" ngonhaung" re gaui qu" mung: naonhaung" kaid' mau" pe" khyo: ngaid: . Jhaung zug: re tau: lhain: genae" i"? ga: ta"20 ko". – Ngo kam" tho' zhao" myhao mae" Mo"so ngonhaung" re caung gam: yu: ra". Ai ru: mung: Mo"so: jeim ngaid: ra" ngon- haung" to" yang: tau: yhe' naeva". Naon- haung" kam" wa Yerusalem tau jao khae , zai yo , soxam: pe" re: maqo" ko" ein: yao: bam re dam: tug' mho: .