1 Ai: ba re yao: bam Moshe khang" dao: jham: re byu qe: qhid' kheim: nghe' kyo" ako". Ai: tung" paug' tau Amon we' Moba byu qe wa Mo"so: volo byu khug mae khyao za: bobo nae" akhang" majo, ra"2 khyo the' myao ko" ra". – Pe" mung: ga" re yao: bam Israel byu qe re zo: nam we' qid: yang malham: tug lo: za: yao: bam re nhang: nae" tau: Balam re jhain: ko" ra". Ai qere: ngonhaung" Mo"so wa nhang: kheim: thoe re min byid: dao: khyo" poe" byid'3 ra". – Ai: tarha" re the' gyo: lao" yao: bam wa alhau: alhag' na mo, re Israel amyu" khug mae" kao" pye' ko" ra".4 Ai: khyo: kaid' qere: ngonhaung" Mo"so: yham qe, khug lhaug' ra" khin jaung Elishib wa Tobia we' byin zam" ngaid: ra" mathao yao" tau: qe, mo" nyhang" to: byid'5 ako". – Ai: jo, qo tau sao qhid' cinmain" jhaung qhu" , ne pyo" ja: , kang: khug' jham , zhag' yu: to" qhovo: mae" daxe bam mae" dabam to" to: yang: tarha" we' dakhyo: Levi byu qe , nghaui" caung" ra" mo, we' kham: lhaug' mo, re myho" byid' ako". Khin jaung we' tin" ra" vo; pyao"6 xeim: re: ai: tau to" to" ako". – Ai: au: ngo wa Yerusalem mae mana. Babilon jhaung zug: Artakhere tao" zaung sam xe: shid' zin ayo, jhaung zug: jhao" vao yang: ayo, gyai myao" lo" thao za: ngo akhang" mho'7 mung: , – Yerusalem: khyo dam: lo: . Ai: au: Elishaib wa Mo"so: yham vang" khug mae Tobia qhid' mae" mashab; ra" mau" zaui qe, re: nyhang" to" ra" khyo ngo qo"8 ba: . – Ai mung: ngo gyai nhag' gyo" kaug' mung: Tobia we' tin" ra" azai: akho alhab' re9 qe, khug mae" tai: thug' pye' yang: , – Qe, jham re shao kyang" nae" tau: nyhang" va". Ai: thao Mo"so: yham we' tin" ra" azai: akho alhab' we' cinmain" jhaung qhu" ne pyo" ra" ja: re ngo dam: nyhang" ke' to".10 Levi byu qe we' tin" ra" jham yao: bam re mabyid: yang: caung da" na: Levi byu qe we' nghaui" caung: mo, khag' re: khag' yao" yothaung: zaui: zo" na ko" ein: ngo11 beim" lo: . – Mo"so: yham re pe" mung: to" pye' co' ko" ein: zug: qe we' jho" ngag yang: Levi byu qe re khai: zhag' mung: khag' re:12 khag' yao" jo, qo tau bam: nha: to". – Ai: au: Yuda byu qe wa gaug zo , sabyi' qang: , xau xe bam dabam jham jo, nho" jhi mae li"13 ke' to" ako". – Khin jaung Shelemi , jham: ba Zadug we' Levi byu Pedaia jham re jo, nho" zam: su ngo jaung: nha: to". Yao: bam: o tau Matania yao: myid: Zakhura yao: zo: Hanan ngaid: . Yao: bam wa vin tang" ra" mo, ngaid: ru mung: mao: nhaung: qe re14 gae byid' ra" mau" vin: ako". – Nga" Mo"so we" ai: mau" mathao: yang ngo re beim: la, . Nga" Mo"so: yham mo" tau: re: , ai we' tin" ra" caung da" mau" tau: re: ngo kaid' lo: gai lho" mau" daphyaug' pye' byid: .15 Ai: ayo, Yuda mang: tau damyo" dugno: ba sabyi' xam nao" ru we' gaug dang: zhang: yang: logung: re mae myao: tho: na ko" ru re: , sabyi' qang: , sabyi' shi: , pho' ham" shi: we' aung: xain: aja: ja: tho zo" dug no: ba re Yerusalem khyo lhai: vhao" ru re: ngo myao: . Yao: bam ceru: aung: zo" ra" ba na mae ngo yao: bam re ta" peim"16 ra". – Ai: tho' mae Turu byu qe re: bona mung: dug no: ba ngo: we' zai acao jab yu: li" yang: Yuda we' Yerusalem byu qe re li"17 aung: byid' ra". – Alao" ngo wa dug no: ba re anyain: avho: kaid' ko" ru wa pe" ru"18 makhyang" mau" ngaid ko". – Phug' pho" qe ai: khyo: kaid' ko" mathao Mo"so: yang ngonhuang" adao mae re: ce: vomo" adao mae re: ceqhi" ra" qug: khai: phau: nhao: ru mangaid: i"?. Ana" naonhaung" yao: dug no: ba re nyain: vho" pye' ko" ru we' Israel adao je: qi" nhag' yo: kheim: joe" nhao genhaung mhao" ein: Yuda zug: ade, qere qeim: ru.19 Dug no: ba joe" lo yang: caid' sham" sham" mung lao" Yerusalem vokham" kham: jham pyid' pye' nae" we' dug no: ba malai shi" re maphung" nae" khyo: ngo amyin" khyo" to". Dug no: ba pe" rere: mavhao" sho' kham: lhaug' nae" tau: nga"20 byu qe damyo" re nha: to". – Ai ru: mung: gau pai: mo, we' zai aja: cao jab aung" ra" mo, wa Yerusalem voyae tau dalhang21 shid' lhang lo lhaung" thang ko" ra". – Ai ru: mung: ngo wa naonhaung" pe" mung: vokham" taung gaung tau yab; ko". Ceru: dam: kaid' gelao" naonhaung" re taung" yu mung: dae byid: nae" ein: yao: bam re qeim: ke' yang: ai: mae" yao: bam dug no:22 ba mali" lo: ko". – Levi byu qe wa dug no: ba shao kyang" nae" tau: yao: yao" gaung shao lho" pye' mung: kham: lhaug' zaung” na nae" khyo: ngo amyin" khyo" to". Nga" Mo"so we" ai: mau" mathao: yang re: ngo re myid beim: yu la, . Ni" masham mapyao: jhid' myid we' ngo re nhag' myain" yu la, wo".23 Ai: ta Azug , Amon , Moba amyu" myiqe: qere vhin" yu: ra" Yuda byu damyo"24 re ngo the' myao: . – Yao: bam: zo: dau qe Yuda myain" maba: jhau yang: Azug' myain" datam" yao: yaug yao: we' xo'25 nhaui: ra" myain" datam" jhau: ako". – Ai mung: yao: bam re ngo qeim: yo" ke' yang: gaui: ke' va". Damyo" re be, mung: yao: bam: xae naid; pye' byid: zo" naonhaung" wa naonhaung" myiqe: zo: qe re ai: mang: khug mae" yaug gai zo: qe re mabyid: zho: lo: , yao: bam: myiqe: zo: jham re naon- haung" yaug gai zo: qe: qhid' mae" mayu byid: lo: , naonhaung" yao: yaug yao: re: mayu lo: na nae" tau: Mo"so: mang lao:26 yang: jham tang: byid: va". – Israel jhaung zug: Sholomun re: ai: ru: shaid' nghung: yang: qobo de, zo" mangaid: i"?. Mang: khao: mang: ngo" yao: we' dau: ra" jhaung zug: mana. Yao" Mo"so re: yao: re jhid' de, yang: Israel damyu" geim" adao tau jhaung zug: poe" ke' ava". Ai qere: yao" gaung yao: taung bug myiqe: qe: mathao shaid' lhoe"27 mau" zao" zaui" ava" nhaung. – Ngon- haung" wa naonhaung" dao: gyo" cao" ru we' taung bug myi vhin" yu yang: nyhao" Mo"so: qhid' kheim: . Ai: ru" ra" shaid' lhoe" mau" qi: zaui" thug' gai nae" i"? ein: ta" ru.28 Khin jaung yin" mo" Elishib yao: zo: Yoada: yaug gai zo: dayaug wa Horoni byu Sanbalad yao: ug ngaid: ra" mathao ngo29 yao: re khe' pye' va". – Nga" Mo"so we" yao: bam wa khin jaung aya: rere: , khin jaung we' Levi qe: dao: so: rere: , nyain: vho" pye' veko" mathao yao: bam re myao byid: la, .30 Ai ru: mung: ngo wa yao: bam re taung bug amyu" alhab' we' gethaung: sain kao" nha mung: khin jaung qe we' Levi byu qe re khag' re: khag' yaug nyang yao: yaug yao: tin" ra" mau" mae jaung: nha: to:31 va". – Tau" ka" to" ayo, re thao: jhaung qhu" we' sao qhid' qo" ra" qhovo: qhoshi: re ngaui" nae" tau: khang" to: va". Nga" Mo"so we" jeju khyo" yang ngo re beim: la, wo".