1 Mo"so o ngaui: ra" khyo" yang Yesu Khristu; logyo: ngaid: ra" ngo Po"lu wa Ephesu vomo" mae na: ra" shaogyang" ra" mo, ngaid ko" ra" Khristu re lam khug: ra" mo, jhao" tung" khye' tung" vhin: ke' ra". –2 AsAng Yesu Khristu we' ngonhaung" pho" ngaid: ra" Mo"so mae" jeju we' yaug yo: ru wa nao nhaung" mae jo; na shao: wo".3 Ngonhaung" wa Mo"so: qhid' kheim: mae jhid' myid khyo" yang shaokyang" mung: qobo mabo yaug boe" nae" tau:4 mae – Mug: gaung myid gaung majo, shi: mae" ngonhaung" re Khristu mae khyin: yu: to: va" ru we' dakhyo: mug: gaung: mang: we' tin" ra" jham: min thaung: jham mae Khristu, khyo" yang ngonhaung" re byid: va".AsAng Yesu Khristu; pho" Mo"so5 wa nga: lho" na veshao: . – Jhid' de; thao" ra" yao: zo" mathao: yang ngo nhaung" re byid' ra" phung bao bo: jeju: akhyo re6 caung: khin" na nae" tau: – Ngonhaung" wa Khristu khyo" yang zo: dau aya: re qo" khae: yu nae" tau: mae yao" o ngaui: nhag' myain" ru we' dakhyo: mug: thug' saopeim mae" nyhang" jaung: to: gau ngaid: ra". –7 Yao" mathao" magain: ra" agyid aso jo; ru we' dakhyo: nyhao: nhaung" wa yao" sa" yang qobo khyaid' pye' byid' ru we' loe;8 beim: ru qhug' bam va". – Yao" juyi myo, jao: yang lam: lang" mung: byid' ra" agyid9 aso wa ai qhi" airu: ngaid: ra". – Mo"so wa yao" nhag' khug mae myid: to" ra" ja: re yao: o ngaui: khyo: yao" no; thao" myid: yaung: to" ra" khyo ngonhaung" re10 qhu" ava". – Ai: ru wa yao: yaung: ra" gu: alhab' re ayo, joe" lao" zaui" pyang" nae" ga" ra" akhyo wa mug: gaung we' myid gaung dao mae" jo, mae: jo, na mae: na alhab' re Khristu mae daboe: dahu" za: yao: jhao" mae zhag' zhang" yu nae" ga" ru11 ngaid: ra". – Yao: wa myid: yaung: to: va" rure gau: qhid' ngho' yang: myid: zang: ci: khyo re mug: thug' saopeim mae" jaung: qang: to: va" we' dakhyo: ngonhaung" re Khristu, khyo" yang Ma khae: yu mo, poe"12 to: va". – Khoru: ga" re Khristu re myid: nghae" lao" na: ra" nyhao:nhaung" khyo" yang yao" phung bao re caung: khin" nae"13 tau: ngaid: ra". – Naonhaung" wa khyaid' yu: khyo we' tin" ra" ngaui bau: mungdao: re qo" gyo" yu mung: Khristu re lam khug yang: shaogyang" Solo: yang so: xam: yu:14 to" ru qhug' veko". – Nyhao: nhaung" khyao kham khyao khae: dao: wa phung bao caung: khin" nae" khyo we' khyaid' yu: ra" khyo majoe" shi" au: ai: Solo wa nyhao: nhaung" Ma qo" nae" ge; to: yaug ngaid: ra".15 Naonhaung" wa AsAng Yesu re lam jang" ru we' shaogyang" ra" mo, alhab' re jhid' kao: na: ako" ga" thoe ngo the'16 gyo" ra". – Naonhaung" mathao mae jeju caung: zo" ayo, khao: ngo" naonhaung"17 tau: jhaung: mho' na: . – Jhaung: mho' ra" akao wa nyhao: nhaung" AsAng Yesu Khristu; Mo"so ngaid: ra" phung qi" ra" pho" Mo"so wa yao: re ba nae" tau: juyi laba lajhao rere: kho' kho' myao: jhoe" ra" au: naug: sozo: du" ru naonhaung" re byid:18 nae" tau: – Khai: yu qhug' ru mung: myid nghae" nae" ja: pe" ja: ngaid: ru rere: shao gyang" ra" mo, qo" khae: yu nae" jo, nho" jhaung qhu" khoqhi" qi" ra" khyo re re: –19 Lam jang" ra" ngonhaung" re qhu" va". Qi" qhang: ra" phung bao qam: so' wa khoqhi" qi" rure naonhaung" ba nae" tau: we' naon- haung" juyi myo, jid' bung" lo nae" khyo:20 ngo jhaung: mho' ra". – Ai: phung bao qam: so' wa Khristu re shid: ru mae" daui: to" nhao mung: mug: gaung: mang: din" dao mae zaung: jo, nhao: ra" Mo"so: qi" qhang: thao" ra" qam: so' yao: ngaid: ra". –21 Ham" hung: kheim: so' phungbao qam: o: ug: gam: ra" akhyo ana" bain: thao phyao" bain: mae kheim: qi" ra" ja: mang khyao: alhab' tho' mae re: mug: gaung: mang: din" lo, yo shaid' mae" myhao: thao" ra" jo, qo22 jham re Khristu re byid' pye' va". – Mo"so wa ja: cao jab alhab' re Khristu; khyid qao: mae to: byid: mung: phung" tau: mae" ga: ja: cao jab alhab' ajhaung au: lam: khyo"23 yao: re poe" to: va". – Ai: phung: wa ja: nam jab alhab' qo" poe" byid: yaug Khristu; gaung khyao ngaid: ra".