Yeremia Kaug' Myain"-5

(SHAO GYANG" JHAM: PAUG' )

切换到福音影视网-新版圣经

  • 1 Mo"so we" ngonhaung" thaung" qhug' ra" ru re beim: so: wa, . Ngonhaung" phau: zo" ra" jung" khyoe' gaui mho shao" pyao ko" ru re myid: nghae" qu" byid: la, .
  • 2 Ngonhaung" dai kham Ma mug: myid wa getau: amyu" lo, khug khyo , ngon- haung" yham dang: jham labug amyu" lo, khug khyo qhaug' pye' ru qhug' va".
  • 3 Ngonhaung" wa pho" maqo" ra" cug' zo: jham ngaid: na va". Ngonhaung" myhi" re: cug' mo" myhi" re" ru: ngaid: ra".
  • 4 Ngaui byid: yang: za: qid qhug' shaug' ra". Thao: re re: vai ngha" ca" ra".
  • 5 Vin kyau: re makhyaid' khyo" lo: vin ca" ra". Mathang mano: mau" zaui" bam va".
  • 6 Zo: nam shaug' pho: qo" nae" tau: mae Egutu mang: byu , Asuri' mang: byu qe jhao" mae lao jhao: vao: bam va".
  • 7 Phug' pho" jham wa qobo kaid' mung: shid: byaug veko". Yao: bam: qobo ngon- haung" thaung" qhug' bam va".
  • 8 Yao" jeim qe wa ngonhaung" re ug veko". Yao: bam: lo, mae" ngonhaung" re khyaid' khyi: yu: byu mana .
  • 9 Seyo mae" shae gye re magyaug mavae lo: sho' zo: nam re qho zo" lo: bam va".
  • 10 Vae: moe; qid shab' phau" ra" mathao mae ngonhaung" gaung sho: wa myi: baui" thaung: ru: no, va".
  • 11 Yao: bam wa Ziun: vo mae myiqe: jham re Yuda vogaung: jham mae zomyi: zo: qe re maqaid maqui" deim: so: zag phavae mau" kaid' veko".
  • 12 Agyi khaung: mhao: qe re yao: bam: lo, mae she: taui" lhao" ci mung: kao qi: mo, re re: maphug' mamyao: ko".
  • 13 Zolau: qe wa laug lhang re vo, ko" ra". Zoshao qe re thao: bam gyid' mae nhai" zag: to: ko" ra".
  • 14 Ade, nhag' bo qe vogaung" kham: dung: mae mazaung ko" ngaid: ra". Zolau: qe wa khulhao: mamaid ko" ngaid: ra".
  • 15 Ngonhaung" ngaui bau" myid gain: byaug va". Ngonhaung" go" nhain" nae" atha" kaug' myain" qhu: thoe mung: ru boe" byaug va".
  • 16 Ngonhaung" zhaung" ra" lhugmaug gyaid: gyo" byaug va". Ngonhaung" zai" shaid' nghung" ru: yang byuxa: voqoe; bam va".
  • 17 Ai mung: ngonhaung" nhag' lam: gyug' main" va". Ai: qobo: mathao ngonhaung"
  • 18 myo, jid' qab qab mung: bam va". – Byu sheim manae lo" ra" Ziun: bam dao mae zag ne jham su: du" qin" veko".
  • 19 Mo"so we" AsAng wa thain" madaui gang" tang: na: ra". La kin re: malam: lai: lo" la kin ngaid: ra".
  • 20 AsAng wa ngonhaung" re pe" mung: malam: lai: to" myhid' pye' mung: ce myhao" ceyo, joe" sho' shepye' to" i"?
  • 21 Mo"so we" ngonhaung" re nao jhao" dam: lhang: lo nhao la, . Ai ru: ngaid: re ngonhaung" dam: lhang: phaug' mung: lo nae". Qhid' phyao: mae" ayo, re dam: tug' byid: la, .
  • 22 Kho khoru: AsAng wa ngonhaung" re gai gai: yao: qhe" khyo" pye' naeva" i"? Nhag' yo" gyid' shi: nae" i"?
回到本卷目录 回到本版本目录 回到首页