1 Mo"so wa Ziun: zomyi: zo: re nhag' gyid' jham thaui" yang nghoe' gam: to: venhaung . Israel amyu" ham" hung: re mug: gaung mae" myid gaung joe" sho' deim" khyo" pye' venhaung . Nhag' yo" gyid' ra" au: yao" khyid nao: jao: re mabeim: maso: lo: na venhaung i"?2 Mo"so wa nhag' mamyain: lo: Yaku' amyu" na jo, qo alhab' geim" re myug: pye' va". Nhag' yo: mung: Yuda amyu" zomyi: zho: cang yham re myid mae joe" sho' phyo' pye' mung: mang: din" we' zug: nau" jham re nga: khyoe' venhaung .3 Nhag' saung" yo" gyid' mung: Israel khyug jham re phyid' khyo" pye' venhaung . Yao" lo, lam: re gyevo jham: qhid' kheim: mae" she: yu mung: khyi" khao: ngo" nga" ra" myi: re" ru: Yaku' amyu" re nga" nhao venhaung .4 Gyevo ru: yao" la: thaung mung: yao" lo, yo lo, tau: ci yang: tau: lhain: mo, shaid' boye; ra". Yaung" lho" ra" mo, alhab' re se' pye' ra". Ziun: zomyi: zo" seim zaung khug khyo myi: ru: yao" nhag' gyid' ru vhe' khyo" sheim" ke' va" ra".5 Mo"so wa gyevo re" ru: kaid' mung: Yaku' amyu" re re: gye byu gai" jham alhab' re re: myug: pye' va" ra". Zho: cang yham mo" re phyo' pye' ava". Yuda zomyi: zo: ngug nae" ra" akhyo re myo: laug nhao: ava".6 Yao" yham vang" re taung yo khyae re" ru: kaid' mung: nag: khyug' qheim" pye' va" ra". Volo phaung kaid' ra" jo, qo re phyo' pye' va" ra". Ziun: vo mae kaid' ra" so: xam: ba we' dug: no: ba re Mo"so to" myhid' pye' nhao venhaung . Nhag' saung" yo" gyid' mung: jhaung zug: we' khin jaung jham re maqu" mageim kaid' ava".7 Mo"so wa yao" xeim: phain re she- lhaui" pye' mung: yao" shao gyang" ra" jo, qo re qu" ca' pye' va" ra". Gye byu gai" jham re gyevo: lo, khyo qhaug' pye' yang: poe ba na re" ru: gyevo jham wa Mo"so: yham mae hug' yhai: na veko" ra".8 Mo"so wa Ziun: zomyi: zo" vokham" re khyoe' mhain" pye' va" ra". Yao: wa taui" yang she: ka" mung: phyo' qheim" khyo" pye' nae" tau: yao" lo, she: lo: nae" mangaid: . Yao: wa gyab lao: dung: khung: we' vokham" kaug' myain" qhu: thoe mung nhao mung: ai jham daga" gyoe; gyo" lo" veko".9 Yao" kham: the: jham wa myid gaung mae nab: lo" mung: kham: kyao" jham re be; khyug' pye' ra". Jhaung zug: we' zug: ade, qe wa tarha" re maba: ra" amyu" jham mae bobo: lo" ko" ra". Lapa jham wa Mo"so: lamyhung" re mathe' khae: yu ko" ngaid: ra".10 Ziun: zomyi: zo" nhag' bo ade, qe wa myid gaung mae zaung: na: jo; ko" ra". Yao: bam wa yao: bam: au: dao mae phaui: lhug gag: gyain: mung: jid: mo" mai lao" yang" ci ko" ra". Yerusalem: zomyi: jham wa myid mae tin: sho' goe; gam" na ko" ra".11 Nga" zomyi: zo: byo; qeim: lo" mung: zoshao zolau: nau" jham wa vogaung" khyo dang mae mo; lo" ko" ra" mathao mae nga" ngug byid: yang myo, ve, ve, mung: na: kyi: . Nga" sang: kheim myidkin dao mae sheim: zaug va".12 Yao: bam: zoshao jham cin we' byo: yhid khai: mae jo; ra" i"? Yao: myhi" re myid: zo" re" dae de' re" ru: vogaung" khyo dang mae mo; lo" ko" mung: yao: myhi" tao: kheim" mae kao gyo" lo" ko" ra".13 Yerusalem: zomyi: zo: we" ni" mau" zo" mae ngo pe" ja" sagso: ci: qhu" zai i"? Nao we' pe" ja: re dau tau" zai i"? Ziun: tang: shain" zomyi: we" nao re nhag' tang" nae" tau: mae nao re pe" nam we' dau tau" zai i"? Ni" byo; qeim: ru wa qid dae mo" ru: lu: ra" mathao nao re zai" gai nae" khoyaug na: ra" i"?14 Ni" lapa jham wa mhug' ru we' akeim aseim: akhyo za: ni" tau: pa byid: ko" ra". Sham" tai: pyaung" lo" ra" mae" loe; lo nae" tau: yao: bam ni" qobo re qo" ci: qhu" ko" ra" i"? Yao: bam mhug' ra" myo, myhung" khyo" khyo nghung: jhui" nghung: akhyo za: ni" tau: pa byid: ko" ra".15 Khyo dang su" lai: lo" mo, wa mug: myid dagye, geim" mae myo, nho nga: lao: ham" hung: qi" ra" vogaung: wa ce: vogaung: i" ga: Yerusalem: zomyi: re lo, pyo' pyo' zo" re" jung" khyoe' au: nghoe" nghoe" yang: myid: ba: ako".16 Gyevo jham alhab' wa nao re nhaid' ho" veko" ra". Ngonhaung" wa yao: re myug: pye' bam va". Gai gai: ceba wa ngonhaung" myid: nghae" tau" da: ra" ba na ngaid va". Ngonhaung" qhug' the' myao va" ga: jung" khyoe' dao: ta" ru we' zaui bin" zag: kyag' zo" re" myid' li" genae".17 Mo"so wa myid: yaung: to" ra" mau" re kaid' ava". Geco' ne, ta" to" ra" dao: kheim: jham re zaui" lhoe" pyang" va" ra". Pe" o: mado lo: phyo' pye' ava". Gyevo jham re ngaui bau: akhang" byid: mung: yao: bam: khyug re zai" myhao byid' ava".18 Yao: bam nhag' kao" khug mae" Mo"so re hug' yao veko". Ziun: zomyi: zo" vokham" we" ni" ngug byid wa qid yug: ru ru: myi" na" makin: yoe: nhao wa, . Nao yao: khyo" dayaug yo nhao . Ni" myo, jid' voxao re danghoe' to: .19 Myi" thao zo" mae to" ye, mung: zag: gyi: hug' wa, . Mo"so: qhid' kheim: mae ni" nhag' myid re qid re" ru: vhe' khyo" ke' wa, . Vae: moe; mo, khyo khain mae mo; lang" lo" ko" ra" ni" zoshao qe re kao so' daui: na nhao nae" akhyo ni" lo, yao: jhao" tau: qang: ke' wa, .20 Mo"so we" nao khag' re khoyaug re ce ru: kaid' qu" i"? myid: nghae" ke' qu" wa, . Myiqe: wa yao: khau: ke' mung: yao" tao: kheim" mae" zonau" re zo: gai nae" i"? Khin jaung we' lapa wa Mo"so: shao gyang" jo, qo mae se' pye' ru qhug' gai nae" i"?21 Byu aqi: angai jham khyo dang myid kang dam: mae gaung lam: sho pyaid' na: bam ko" ra". Nga" zolau: zo: qe we' zomyi: zo: jham wa shae mae shid veko". Mo"so nhag' yo" gyid' ra" ba mae yao: bam re nhag' mamyain: lo: se' pye' va" ra".22 Khang" to" ra" poe ba mae byu jham re khai: ru we' dakhyo: nao nga" avai: ayae mae" gyaug pho" re khai: to: venhaung . Mo"so nhag' yo" gyid' ra" ba mae khag' re: maloe, . Khoyaug re: gai: dang nae" mangaid: . Ngo khau: qhang" qhi" ke' ra" mo, re nga" gyevo jham wa se' mhain" khyo" pye' veko".