1 Byu gyai myo: laug mung: vu nang ga" ra" vogaung: wa byu sheim manae lo" ra" vogaung: boe" byaug venhaung i"? Byumyu" mae gai lho" ra" myiqe: wa cug' mo" ru: boe" venhaung i"? Mang: din" zug: myhi" wa khang" daug ke' na venhaung i"?2 Yao: wa myi" mae saung" ngug mung: yao" boqae mae ngug byid jhug' dag: jo; ra". Yao" zoqae: jham wa yao: re nhag' tang" ru dayaug re: mana ko" ngaid: ra". Ba nam sang: cao: alhab' wa dao: so: mazaung gye kaid' nae" mo, za: ngaid ko" ra".3 Yuda zomyi: zo: wa yhin" pyam" ru , maqaid maqui" nhao zo: ko" mathao mae kyam: laung" lo" va". Labug: amyu" khug mae bona yang: na gai yaug yo nae" mangaid: . Cao" khe' ra" mo, wa lhae" jhe' ra" jo, qo mae yao: re khe' myhi ko" ra".4 Poe khyo khag' re: mali" ko" mung: Ziun: khyo dang wa kaug' myain" mung: na: ra". Yao" kham: dung: jham re: byu sheim manae cae: jhug tag mung: jo; ra". Yao" khin jaung jham re: kaug' qhui: na ko" ra". Zomyi: jham kaug' nyung: na ko" mung: yao" gaung yao: re nhag' ngai: na: ra".5 Yao" qobo saung" xo: byaug: ra" mathao Mo"so qobo dae byid: yang: yao: we' tug' shai" ra" mo, au: she boe" mung: yao: re gye kaid' mo, na gai ko" ra". Yao" zo: dau jham re re: sham" jhui" lo" ko" ra".6 Ziun: zomyi: zo" ham" hung: wa lam: maug yao: bain" lo" byaug va". Yao" zug: qe wa gyo, zo: jao: mathe' myao: ra" cid phaug' we' dau mung: qam: o: mabo lo: mung: cao" khe' ko" ra" mo; qhid' au: mae su" na ko" ra".7 Yerusalem: wa qug: khai: kyi" khyag' qhug' ra" ayo, mae qhid' phyao: na pyo: ye, pyo" lo: ra" akhyo re myid: beim: so" ra". Yao" byu jham gyevo: lo, khug vao lo" mung: bao" yu nae" byu mana mabo ko" au: gyevo jham yao: re myao mung: yao: seim: gyoe; gyo" ru re qu" jung" ko" ra".8 Yerusalem: zai" shaid' nghung" ra" qobo wa saung" xo: byaug: ra" mathao ca' pho: boe" ra". Yao: re phug' myao" qu" ra" mo, wa yao: gaung lam: shopyaid' ru re myao mung: pe" shui manho , maphug' makhyaid' kaid' ko" ra". Gai gai: yao: re: no kyang: kyang: zo" re" thao khyo qui" lo" ra".9 Yao: mae mashao malho" ra" ave, bao bao ngaid: na qe re: thao khyo pe" boe" nae" ru re mabeim: ngaid: ra". Amung: yao: mug' sho' deim" zag: khyo" ke' mung: bao" thaug' nhag' tang" nae" khag' mabo ngaid: ra". Mo"so we" ngo sho: jhin: ru re qu" myao byid: la, . Gyevo wa yao" gaung re nga: yu: na: ra".10 Gyevo wa yao" dai kham jo, nho" re lhaid' yu: lo" va". Ni" mo, phaung mae magai: bovao ga: nao khang" to" ra" taung bug byumyu" jham wa yao" shao gyang" ra" kug qe, khyo vao ko" ru yao: myao: na gau ngaid: ra".11 Yao" byu jham wa nyung zo" re" cinmain" re qho: na ko" ra". Kao loe, nae" tau: mae yao: yao" jo, nho" re zo: pho: tha" yu veko" ra". Mo"so we" ngo gaui mho shao" pyao: ru qhug' ra" mathao ngo re qu" gam caung: yu la, .12 Gyaung: su" ra" mo, we" myid: qu" byid: gela, . Mo"so nhag' kyid kyid yo" ra" ba mae ngo re pyam" yhin" mung: boe" nhao: ra" qug: khai: we' dau: ra" kyi" khyag' jo, shi: nae" i"?13 Nga" shoqug: shoqae re ngha" mhain" khyo" nae" mung: tho' khyo" myi: nhao: ke' venhaung . Nga" khyid myi" nae" taui: khae mung: kaid' to: venhaung . Dane, geim" nhag' lam: gyug: nae" khyo: ngo mae boe" nhao va".14 Ngo zai" shaid' ra" qobo: kyau: re yao" lo; yang nga" lang zang: mae vhin mung: taui" te' bin lao" Mo"so wa ngo re qam: khyug' byid: mung: ngo maqo" tam" kyo" ra" mo; lo, khug khyo ngo re qhaug' va" ra".15 Mo"so wa nga" sulhe: jham alhab' re nga" agaung: mae tang" nha co' va". Nga" zolau: zoqae jham re pyam" yhin" nae" tau: byu mo, mo" thaui: khai: yu va". Mo"so Yuda tang: shain" zomyi: re sabyi' pyag' xam mae pyag' pye' ava".16 Ai: akhyo mathao mae ngo ngug va". Ngug byid zo; gyo" na: . Nga" kao re bao" thaug' mung: nhag' tang" nhao nae" yaug we' ngo va" lin va". Gyevo wa aung va" ru mung: nga" zo: dau jham: myo, nho nga: lao: malho" lo: ko".17 Ziun: zomyi: wa yao" lo, vo: khae ngaid qere: nhag' tang" nae" su mana . Mo"so wa Yaku' lhang" gam: mae gyevo jham nha: to: va". Yerusalem: wa byu qe mae ca' pho: boe" va".18 Mo"so wa tarha" jo main: khyo" dao: phyid' ra". Ngo wa khang" dao: tarha" re lhoe" shaid' va". Byumyu" cao jab jham we" tae" gyo: mung: nga" qug: khai: kyi" khyag' re myid: nghae" qu" ge, wo". Nga" zolau: zomyi: jham re sham" lo" veko".19 Ngo wa zoqae: jham re khai: qu" va". Yao: bam dao: so: mazaung ko". Nga" khin jaung jham we' kao qi" ra" mo, yao: yao" kao so' khau nae" zo: pho: qho su: du" na: au: vo khug mae kao gyo" ko" ra".20 Mo"so we" qu" ke' qu" wa, . Ngo qug: khai: thaung" qhug' na: . Ngo myid myo: myid laug: na: . Ngo wa gyai yao: shaid' nghung: va". Taung gaung mae shae gye qhug' ra". Qe, khug mae shid zug: na: ru ru: ngaid: ra".21 Ngo no kyang: kyang: thoe the' gyo: ko" ngaid qere: nhag' li" tang" nae" byu mana . Ngo thaung" qhug' ra" qug: khai: re gyevo jham the' gyo: mung: ce ru" mau" zo" nao poe" byid: mung: yao: bam ngaui bau: ko" ra". Nao tau" phyid' to" ra" ba na nao joe" nhao mung: yao: bam wa ngo re" ru: boe" vegeshao: wo".22 Yao: bam zai" shaid' nghung" qobo alhab' re ca: qu" byid: la, . Ngo zai" shaid' nghung" ra" yug: no qobo: mathao mae nao ngo re kaid' ru we' dakhyo: yao: bam re re: kaid' wa, .