1 Ngo wa Mo"so: qam thaung: gyid' mae masho: majhin nhag' ngai: ru khae: yu: ra" yaug ngaid: .2 Ngo re bo" bao khyo madai". No, tang: lang" khug khyo dai" byid' ra".3 Gai gai: yao: ngo re dane, geim" alhang lhang dae byid' ra".4 Nga" shoqid we' sho: re qeim" ze: nhao mung: nga" shoqug: re re: nag: khyug' mhain" pye' ava".5 Yao: wa nga" qhid' kheim: mae gyab lao: dung: dau: mung: kho" ra" ja: , myaung: dug nae" akhyo jham we' lhang" kham" to: va" ra".6 Geco' ne, shid: lai: lo" mo, re re" ru: yao: ngo re mug: caid' khug mae na nhao: ra".7 Ngo maqo" gai: phao: thug' lo: sho' khyae kyae" mung: la" ra" jao co" yang ngo re taui" ra".8 Ai za: maka" ngo zag: yao yang: jhaung: mho' ngaid qere: ha: pye' byid' ra".9 Ngo ye" lo" ra" khyo dang re laug the" yang jhid' mung: khyo kaui gau: khyo" ye" lo" nhao: ra".10 Yao: wa nga" qhid' kheim: mae jhug' qu" na: ra" vae we' thao" paung" mae goe; na: jo; ra" lo: tin: ru: ngaid: ra".11 Yao: ngo re khyo nghung: nhao mung: adau atam" zin" phyid' phyo' sin" pye' va".12 Yao: la: thaung: ci mung: bag nae" thao tae mae ngo re nha: to" ra".13 Yao" myo: khe' re nga" no ce' mae bag: kyao" nhao: ra".14 Ngo wa nga" byumyu" qe mae jung" khyoe' jao: , daba geim" ji: dao: khyo" nghaui" nae" akhyo boe" va".15 Yao: wa ngo re kho: kyag' mung: we' zai" pyang: yang: myaug daug: yang jhaug' yhid' venhaung .16 Yao: wa ngo re laug je, boke' zho: mung: nga" zaui gyug' lo" va". Yao: ngo re myiqe, gag: gyain: byid: va".17 Nao wa ngo re ngaui bau: yaug yo: ru we' va" lin nhao mung: na gai gaug qo" ca" akhyo re ngo to" myhid' pye' va".18 Ai ru: mung: ngo wa nga" qam: o: we' Mo"so mae" nhag' myid nghae" ru baui" byaug va".19 Ngo thaung" qhug' ra" qug: khai: we' kyi" khyag' ru myaug daug we' kyid qang: re beim: so: byid: la, wo".20 Nga" sozo: wa ai re myid: beim" na mung: goe; gam" na: .21 Are" ru: nga" nhag' lam: khyo" myid: nghae" qu" mung: beim: so" ra" au: nhag' nghae: nae" akhyo the' myao: ra".22 Mo"so nhag' khyag' shogu: mung: nhag' myain" ru wa gain gin makhin" ra" mathao ngonhaung" wa byo; qeim: khyo majoe" lo: qo" na: bam: .23 Ne, seim khao: ngo" nhag' myain" ru asag' qo" the' yu: na: bam: . Yao" dao: so: wa gang: tang: ra".24 Nga" sozo" nhag' myid wa Mo"so nga" tau: mae" ngaid: . Ai mung: AsAng re ngo myid: nghae" lao" na: .25 AsAng re myid: nghae" na: ra" yaug we' AsAng re qho: ra" yaug: sozo: re Mo"so wa26 jeju kaid' ra". – Khyaid' khyi: yu: nae" ga: myid: nghae: zo" yaug yo za: lao" mung: na: jo, gai: ra".27 Byu sosu wa kao ngai shi" yo, mae kyau: vin nae" gai: ra".28 Ai: kyau: wa yao: re vhin: to: va" mathao dayaug yao: za: zaung: jo, mung: phain dang yaug yo: na veshao: .29 Nhag' nghae: jao: jo; re jo; li" nae" ga: jho mung: yao" nhaid' re phaui: lhug bam mae yo, veshao: .30 Be; ra" yaug re yao" boqae re byid: mung: jung" khyoe' shao" pyao: ru phau: veshao: .31 Khoru: ga" re Mo"so wa khonhae" re: shepye' nae" mangaid: .32 Nhag' ngai nhao ngaid qere: nhag' myain" ru myo: laug: ru we' dakhyo: nhag' khyag' shogu: li" nae".33 Yao: wa Sosu byu qe re thaug ga: yhin" pyam" mung: nhag' ngai nhao: ru mangaid: .34 Kyam: laung" ra" mo, re zab: nhaug' jab: pye' ra" mau" ,35 Sosu byu thaung" qhug' nae" main: qi" ra" tarha" re myhao: thao" Mo"so: qhid' kheim: mae phyo' pye' ra" mau" ,36 Su geje re matarha" ra" khyo" lhau: said' ra" mau" re Mo"so ma-o ngaui .37 Mo"so mamho: to" ru ta" yang: qo" kaid' boe" nae" i"?38 Myhao: thao" ra" Mo"so: nhaid' mae" gai: ru we' byu xa: vo: qoe; ru thug' nae" mangaid: .39 Daui: na: ra" byu wa pe" mung: nyung nae" i"? Yao: yao" qobo: mathao nyung zai ngaid: ra" i"?40 Ngonhaung" wa yao: yao: cao" ra" khyo dang re ca: qu" mung: Mo"so jhao" dam: tug' lhang: lo" gelang: .41 Mug: gaung: dao mae na: Mo"so jhao" nhag' lam: aung khug: nhag' myid lo, re tau: ci gelang: .42 Ngo wa zai" shaid' mung: tau: lhain: venhaung . AsAng wa qobo malhoe' ngaid: ra".43 Nao wa nhag' yo" gyid' ru re lao" yang: ngonhaung" re cao" khe' mung: nhag' makhyag' lo: se' pye' va" ra".44 Jhaung: mho' ra" dao: nao jhao" majoe" lo sho' jham thaui" yang thab' go: pye' nhaung .45 Nao wa byumyu" qe mae ngonhaung" re boe, said re" ru: maca' majhaid' boe" nhao va".46 Gyevo jham wa ngonhaung" re nhaid' ho" veko".47 Gyaug: din pho: we' mang: khung: ru: sham" shao: khyo" ru wa ngonhaung" jhao" joe" va".48 Nga" amyu" zomyi: byo; qeim: lo" ra" mathao mae nga" myo, jid' mae" qid ru: yug: thug' na: .49 Mo"so wa mug: gaung mae" gam" qu" mung: soxam: yu: ra" ayo, joe" sho' ,50 Nga" ngug byid wa mathang mano: ayug: gyo" na: .51 Nga" vogaung" zomyi: qe alhab' tau: mae nga" myo, jid' wa nga" sang: kheim re laung nhao: ra".52 Nga" gyevo jham wa ngho' re cao" khe' ru re" ru: ngo re cao" qho ko" ra".53 Yao: bam wa dung: gyain: mae nga" kao re zai" kain" mung: nga" adao mae laug baui: yang nhai" zag: to: ko" ra".54 Nga" au: re qid: yang nhai" lo mung: ngo wa bin: ava" ein: mho va".55 Mo"so we" dung: gyain: khug mae" ngo ni" mang khyao: re khai: yao va".56 Ngo zag: yao thoe re the' gyo: mung: ngo hug' nyung: na: ra" au: ni" no: khye' dalhang: phaug' lo" wa, .57 Ngo AsAng re hug' yao: ke' au: AsAng wa qui" te' li" mung: dagyaug daci" ga: mho va".58 Mo"so we" AsAng wa nga" kao so' we' tin" gu: re qid: mung yang: nga" kao re khyi: khyaid' yu va".59 Mo"so we" AsAng wa ngo phau" ra" pyam" yhin" ru re the' myao va". Nga" mau" re phyo" phyid' byid: la, .60 Yao: bam ngo re gye she: ra" gu: alhab' we' magai: ra" tau" yaung: khyo jham re AsAng the' myao gau ngaid: ra".61 Mo"so we" yao: bam khang: nhau: jung" ra" akhyo we' magai: tau" yaung: to" ru re re:62 Ngo re qobo zhaug' ko" ra" mo; nhaid' thoe we' daba geim" nga" akhyo magai: ru myid ko" ra" mo; dao: thoe nao the' gyo: va" ra".63 Yao: bam zaung: jo; ru to" lo" ru re qu" wa, . Ngo wa yao: bam: ji: dao: zham" poe" ava".64 Mo"so we" yao: bam: lo, mau" we' dakhyo: yao: bam re qobo dae byid:wa, .65 Nao yao: bam: nhag' lam: re qao nhao mung: yao: bam re nhang: kheim: ke' nae" ngaid: ra".66 Nao nhag' yo" ru we' yao: bam re cao" khe' qho mung: Mo"so mug: gaung gyid' mae" sham" shao: lhaui" pye' nae" ngaid: ra".