1 Hhang wa khoru: mung: amai: boe" byaug: laug i"? Hhang agyang" wa khoru: mung: lai" lo" laug i"? Shao lho" ra" laug baui jham wa khyo kao: khao: ngo" abyi asin: jo; qain" bam veko".2 Gyang" thao" ra" hhang tho' phug' de; ra" Ziun: vobyu jham re ug' kaid' yaug kaid' ra" myid zhai: ug' re" ru: khoru: gai: jho nae" i"?3 Zagne myhi" jham lhao" re: yao: bam: yao: zo: qe re nug' shi: qang byid: mung: nug' jhaug' ba ko" ra". Nga" byumyu" myiqe: jham kam" wa seyo mae ngho' myhi" jham re" ru: qain: ra" nhag' myid bo ko" ra".4 Nug' shaug' zoshao wa nug' shaug' nug yang: sho wa o mae de; byaug: ra". Zoshao qe cinmain" mho' ko" qe re: gau: byid: nae" su mana ngaid: ra".5 Myho' myho' za: lhaung" zo" ra" mo, wa khug ngha jao: majo, khyo dang mae na: bam ko" ra". Amo, yab qo yab pyo" qu" ra" mo, wa nung: khyid' bam re ge; vo, ko" ra".6 Khag' re: qam: make' lo: nyag tin" labaug byo; qeim: lo" ra" Sodom: vogaung" qobo tho' mae nga" amyu" zomyi: zo" qobo wa je: qi" ra".7 Yao" agyi khaung: mhao: jham wa gyu: tho' shao lho" mung: gyu: qang: tho' phyu ko" ra". Yao" sho: wa laug ne tho' ne: ra". Sa: gyi: jham re: laug bo" ne we' dau ko" ra".8 Ana" kam" wa yao: bam: ave, wa mug: caid' yo tho' no, gemung: khyo dang mamyao malau" yao: bam wa shoqug: mae shoqid za: lham: yang: thao: kyaug' gae ru: boe" veko" ra".9 Shae lhae mae shid: ra" yaug wa vae: moe; yang: shid: ra" yaug tho' je: gai: ra". Yao: bam: gaug zo maui: lam: gain: byaug: ra" mathao anyhaung ajhoe' angaung: akhyoe" boe" yang so' she: thao" lo" ko" ra".10 Nhag' ba: myain" ra" myiqe: qe wa yao: yao" zo: nau" re lao" re: jho' ko" ra". Nga" amyu" myiqe: qe wa qug: qae" byo; qeim: ayo, mae yao: yao" zo: dau qe re lao" zo: ko" ra".11 Mo"so wa yao: nhag' yo" ru re pyang" lhoe" va" ra". Yao" nhag' gyid' ru re vhe' khyo" va" ra". Ziun: vogaung: re myi: ngha" mung: ai: myi: wa vokham" apain qao: tae joe" sho' nga" va".12 Gye she yaug we' gye khaid' yaug wa Yerusalem: kham: dung: akhug khyo qo" vao ko" ga" ru re myid kin: jhaung zug: we' byu jham dayaug re: malam" ko" ngaid: ra".13 Ce ru wa lapa qe we' khin jaung jham shaid' nghung" qobo: mathao mae boe" ru ngaid: ra". Yao: bam wa Yerusalem: vogaung: kao" mae din: main" ra" mo; sa: re zai" yhug' ko" ra".14 Yao: bam wa myo, jid mo, re" ru: vogaung" khyo dang mae soe' du" lhau mung: sa: lhau: ko" ra" mathao khag' re: yao: bam: mai bau: re mavae" tin: ngaid ko" ra".15 Byu jham wa qu" ge, . Mashao lho" mo, re jao" ge, jao" ge, . Yao: bam re daye: the' tin: ge, ga: zag: hug' ko" ra". Yao: bam phao: lae" qin" ko" ru yao: bam ce: jo, qo mae dam: lo: khug ngha: na lo: genae" mangaid: .16 Mo"so wa yao: bam re nhag' yo: yang: pyo: sin" ke' va". Yao: bam re lhang: qu" lo: nae" mangaid: . Su re: khin jaung jham re maphug' lo: , kao qi: mo, re myo, qho' mabo lo: na: bam veko".17 Ngonhaung" myo, jid' qeim sho' bao" thaug' nae" yaug re ana" ba joe" sho' akeim za: nghae" na: . Maqo" khyaid' yu nae" byumyu" re gye byu gai" dao mae pe" so' ha" maqo" ru lao" na: bam va".18 Ngonhaung" khyo dang mae magai nae" khyo: ngonhaung" khu re cao" mha: ko" ra". Ngonhaung" wa gain: thao" nae" jhao" va". Kao daui: na nae" ayo, akhin: wa byang" loe" va".19 Ngonhaung" re cao" qho: ra" mo, wa mug: le; phyo: mae" zeim baung: tho' je: mye, ko" ra". Bam dao khain cao" qho ko" ra". Seyo mae re: jhug' qu" lham: na ko" ra".20 Ngonhaung" so' she: thug' she: vao ga" ra" xau gyain: khae: yu: ra" yaug re yao: bam wa dung: gyain: mae qhug' taui: veko". Ai: AsAng: phung bao ham" hung: mae khug ngha mung: byumyu" qe mae qo" na: na nae" ein: ta" qu" bam va".21 Uza: mang: mae na: ra" Edom: zomyi: zo: we" ngaui bau: zhao: yao se, . Yao" keim nao jhao" joe" de; lo: li" nae". Nao wa yhid yid mung: gaung lam: sho pyaid' na: li" nae".22 Ziun: zomyi: zo: we" nao khae: yu ang: ra" qobo dae gain va". Thao phyao: sham" pyaung" tai: ru qhug' lo: nae" mangaid: . Edom: zomyi: zo: we" nao zai" shaid' ra" qobo re ca: qu" mung: ni" qobo re ceim" shid' li" genae".