1 Yao: na Nomi wa nga" dau mo" we" nao na myain ye, lho" nae" tau: ni" aqao:2 vai" nae" ngo qho byid' re magai i"? – Ana" nao zam" na: ra" zam" cao: myiqe: zo: qe: asang Boza wa ce: yham bao" akaung mo, khyae: ngaid: mangaid: i"? Ana" myi yao: gaug nao: jao: mae mug'yo" gaug3 khyo" ga: na: na: li" nae". – Ai ru: mung: nao gaung cid' , xau gyaid; ci yang: bau: shaung: ve; ci mung: gaug nao: jao: khyo ye: wa, . Ngaid qere: yao: zo mabin: zo: zo:4 wa ni" gaung yao: re daqhu". – Yao: yab lao" za: yao" yab jao: xam" to: yang: vao lo" wa, . Yao" khyid nghoe' to" ra" mai pho' tau: yu mung: bocao: lang" jo, wa, . Alao" khoru: kaid' nae" khyo yao: ta" li" nae" ga:5 gelho: pin: ke' ra". – Rutha wa yao: na re nao ta" khyo: ada" zo, ngo zaui: so: nae"6 ga: khae: yu: ra".- Ai mae" yao: wa gaug nao: jao: khyo ye: mung: yao: na pin: ke'7 ru we' dakhyo: kaid' ra". – Ana" Boza wa bin: zo: shaug' yang: myid pyo" ru we' gaug bam nhae mae yeyab; jo; ra". Alao" Rutha re: sae za: qui" ye: yang: yao" khyid nghoe' ra" mai pho' tau mung: bocao: lang" jo;8 ra". – Myi" gae gaung: re yaug gai wa din: ru we' phaug' lhang: ke' re myiqe: dayaug9 yao" khyid thao mae lang" jo; ra". – Yao: wa nao khag' ngaid: ga: myid' qu" re ngo ni" jeim Rutha ngaid: . Nao wa ngo re cug' gai: gaug; ra" mo, khyae: yham ngaid: ru mung: ni" jeim myhi" re ni" bau: qhang thao: yang vhe' gam: yu la, ga: ta" ra". –10 Boza wa nga" zo: we" nao re Mo”so min byid: veshao:. Nao qo" ra" zolau: , myaung: ra" zolau: khag' re re: myid mavao zo" ra" mathao sao qhid' kaid' byid' ra" jeju tho' ,11 thao: re" jeju je: qi" ava". – Ai ru: mung: nga" zo: we" gaung dayug , . Nao mho' mae" mho' ngo zaui: byid: nae". Nao ve, lho" shaung kin bo: ra" myiqe: ngaid: ra" akhyo nga" byumyu" qe na: vomo" davo:12 geim" ba: aveko". – Ngo wa cug' gai: gaug: ra" mo, khyae: ba nam ngaid: ru dang: ra". Ai qere: ngo tho' je yang: te' ra" mo,13 khyae: ba nam dayaug na: ashi". – Ana" myi wa na shi: wa, . Ne, mo" ba khyo jo; ru we' dakhyo: ai: yaug yao: gaug nug: re gaug veshao: . Cug' gaug qere: gai va". Yao: magaug nug lao" wa Mo”so daui: na: ru we' dakhyo: ngo gaug nae". Mug: bo"14 sho' yab; jo, shi: wa, ga: mho: ra".- Rutha re: thao: ne, kao joe" sho' yao" khyid qao: mae yab; jo, mung: yao: cao: maqo" jho" ba shi" ayo, re to" lo" ra". Yaug gai yaug wa ce: gaug nao: jao: khyo myiqe: li" ra" akhyo khag' re re: daba nhao ga: mho:15 ra". – Xo' yang: yao: wa ni" mai pho' yu: lo yang: li" lao" lhung" to: ri: ga: ta" ra". Ai we' dakhyo: yao: lao" lhung" to: mung: Boza wa mug'yo" gaug khyaug' bye: lag: vhin: ke' yang: yao: re: vogaung: khyo lo" byaug;16 ra". – Yao: na jhao" joe" lao" dau mo" we" khoru: ngaid: ga: lham: myid' re yao: wa yao: mae ai: yaug khoru: kaid' ra" akhyo17 bin sho' zhao: kyo" ra". – Xo' yang: yao: wa ni" na jhao" lo, keim dalo" ga: ta" mung: ce mug'yo" gaug khyaug' bye: byid' ke' ra"18 khyo re: ta" kyo" ra". – Alao" yao: na wa nga" dau mo" ce: mau" khoru: bin: kyab' nae" qo" ba sho' lao" tae" gyo" na shi: wa, . Ai: yaug gai wa ana" ba ce: mau" mabin lo: mathang: nae" ga: ta" ra".