1Yohan-5

(SHAO GYANG" JHAM: PAUG' )

切换到福音影视网-新版圣经

  • 1 Khag' ngaid qere: Yesu wa Khristu ngaid: rure lam" yaug wa Mo"so mae" khau: li" ru ngaid: ra".Yao: re khau: ke' ra" Mo"so re jhid' de; ra" yaug khao: ngo" wa Mo"so: yang khau: to: yaug re re: jhid' de;
  • 2 ra". – Ngonhaung" wa Mo"so re jhid' de, mung: yao" amyin" dao: jham re gyo" cao" lao" cekhyo" yang Mo"so: zoshao qere jhid'
  • 3 de; ru ngonhaung" qo" ba: ra". – Khoru: ga" re Mo"so re jhid' de; ru ceru wa yao" amyin" dao: jham re ngonhaung" gyo" cao" ru ngaid: ra".Yao" amyin" dao: jham
  • 4 wa qola: mangaid: . – Mo"so: yao: zo: ngaid mo, alhab myidgye, re aung: pye' ra". myidgye, re aung: pye' ra" aung doe; ru wa ngonhaung" lam" nhag' myid ngaid:
  • 5 ra". – Yesu wa Mo"so: yao: zo: ngaid: rure lam" yaug mae" lai yang: myidgye, re aung: pye' yaug khag' ngaid: i"?.
  • 6 Qid we' sa: khyo" yang joe" li" yaug wa Yesu Khristu yao: ngaid: ra". Qid khyo" yang za: joe" li" ru mangaid: qid we' sa: khyo" yang joe" li" ru ngaid: ra". Solo wa dang main" mung dao: ngaid mung: sagso:
  • 7 kham yaug wa ai: Solo ngaid: ra". – Khoru: mung: ga" re mug: gaung mae sagso: kham yaug sam yaug na: ako". Pho", Mung- dao we' Shaogyang" Solo ce sam yaug wa
  • 8 dalam: za: ngaid: ra". – Myidgaung mae sagso: kham ru sam ja: jo; ako". Solo , Qid we' Sa: ce sam ja: wa daja: za: ngaid:
  • 9 ra". – Ngonhaung" byu: sagso: dao: khae: yu: ngaid: re wa Mo"so: sagso: dao: re wa je: gai: khae: yu: ra". Khoru: ga" re Mo"so: sagso: dao: ce ru wa yao: zo" akhyo re
  • 10 sagso: kham: ru ngaid: ra". – Mo"so: yao: zo: re lam" yaug wa yao" khug mae sagso: dao: bo: jo; ra". Mo"so re malam" ra" yaug kam" wa Mo"so re mhug' yaug boe" nhao: ra". Pe" mung: ga" re Mo"so wa yao: zo" akhyo sagso: kham: ra" dao: re ai: yaug wa
  • 11 malam" ngaid: ra". – Ai: sagso: dao: kam" Mo"so wa ngonhaung" re apyaid ato: kao so' byid' ru ngaid: .Kao so' ceru wa yao:
  • 12 zo: khug mae bo: ra". – Zo: re qo" ra" yaug wa kao so' re: qo" va". Mo"so: yao: zo: re maqo" ra" yaug kam" wa kao so' re: maqo"ngaid: ra".
  • 13 Naonhaung" apyaid ato: kao so' qo" rure naonhaung" qo" ba nae" tau: mae" we' Mo"so: yao: zo" mang re naonhaung" qo" lam" nae" tau: mae" Mo"so: yao: zo" mang re lam" mo, naonhaung" re cejham
  • 14 ngo tung" ke' ra". – Yao" khug mae ngon- haung" qo" ru vae" ra" lam" nhag' wa ceru ngaid: ra". Yao: o: ru we' dakhyo: ngon- haung" daja: ja: mho' re Mo"so tae" gyo:
  • 15 byid' ra". – Jhaung: mho' ra" dao: alhab' re tae" gyo: byid' ru ngonhaung" ba lao" yao: mae" mho' ra" jhaung: jham re qo" nae"
  • 16 ein: ngonhaung" ba: ra". – Dayaug yaug wa yao" mao:nhaung: shid nae" qhi" sho' mangaid' ra" qobo shaid' na: rure myao: re ai: yaug jhaung: mho' ca" nae".Shid nae" qhi" sho' mangaid' ra" qobo shaid' ra" ai bam re Mo"so wa kao so' byid: nae". Shid nae" qhi" sho' qobo daja: ja: jo; ra". Ai: qobo loe, nae" tau: jhaung: mho' ca" nae"
  • 17 ein: ngo mata". – Madang main" ru alhab' wa qobo ngaid: ra". Shid nae" qhi" sho' mangaid' ra" qobo re: daja: jo; ra".
  • 18 Mo"so mae" khau: li" ra" yaug khag' ngaid qere: qobo mashaid' rure ngon- haung" ba: ra". Mo"so mae" khau: li" ra" yaug wa yao: yao" gaung re yao: qo" gam: ra". Ai mung: ai: makhyang: yaug wa yao:
  • 19 re mazao" thaung: – Ngonhaung" wa Mo"so mae" ngaid mung: myidgye, alhab' geim" wa ai: makhyang: yaug: lo, khug
  • 20 mae na: rure ngonhaung" ba: ra". – Dang main" ra" yaug re ngonhaung" qo" ba nae" tau: mae" Mo"so: yao: zo: joe" li" mung: ba se" nae" nhag' myid juyi ngonhaung" re byid: va" rure ngonhaung" ba: ra". Aimung: ngonhaung" wa dang main" ra" yaug khug mae na: ra". Airu wa yao: zo: Yesu Khristu khug mae na: ru ngaid: ra". Yao: wa dang main" ra" Mo"so ngaid mung: apyaid ato:
  • 21 kao so' ngaid: ra". – . Zo: dau qe we" sulho jham re jao" lha" na ge, . Amen..
回到本卷目录 回到本版本目录 回到首页