Philipi-4

(SHAO GYANG" JHAM: PAUG' )

切换到福音影视网-新版圣经

  • 1 Airu: mung: mao: nhaung: qe we" ngo wa naonhaung" re gyai jhid' de; ru we' gyai myid: beim" ra". Mao: nhaung: qe we" ngo ta" lai: lo va" ru we' dakhyo: naonhaung" wa Moso mae gang: tang taung" kao daui: na ge, .
  • 2 Evodi we' Suntukhi tao we" Asang mae daqam: daqhi za: boe" na genae" khyo re
  • 3 jeju khyo" ngo mho' bain" ke' ra". – Nga" mau" vin cao: agyang" we" nao rere: ngo mho' bain" ke' ra". Ngo we' Kalemen mae" da du kao so' japhin: vao: ra" getau mau" vin cao: qe we' daga" ngaui: bau: lau dao: hau" kyo" ra" mau" mae qam: ke' bao" thaug' lo ko" ra" myiqe: myhi" tao re bao" thaug' na wa, .
  • 4 Asang Moso mae khonhae" re: ngaui bau" na ge, . Ngo paug' yang: dam: ta" nug:
  • 5 ru wa ngaui bau" na ge, . – Byu alhab' mo; qhid' kheim: mae naonhaung" nau" nhae" ra" rure qhu" byid' na ge, . Moso wa ajhao"
  • 6 mae za: na: na: ra". – Khoru" ra" mau" zo" ngaid qere: gaung mayug lo: ja: khao: ngo" mae caung: khin" zo" jhaung: mho' ra" khyo" yang naonhaung" mho' nug: akhyo
  • 7 jham re Moso re mho' yao: na ge, . – Airu: kaid' lao" khag' re: mamyhi: myid: joe" kyao" ra" Moso: yaug yo: ru wa Khristu khyo" yang naonhaung" nhag' myid re gam caung byid' li" nae".
  • 8 Dang shi" dao: kheim: jham ein: ru wa Mao: nhaung: qe dang main: tarha" we' tin" ra" ave, phug' de; ra" ave, , dang main" ave, , shao lho" ave, , su qu" ngaui taung" ave, , caung: khin" gai: ra" ave, jo; gu: alhab' rere: gai: ra" ave, angau: we' tin" ra" pe" ja: ngaid qere: aung khug mae ke' to:
  • 9 ge, . – Nao nhaung" wa lai: lo va" ayo, ngo mae" mho" yu: gyo" yu: the' myao va" jham re cao" na ge, . Airu: cao" na ko" ngaid: re yaug yo: khyo Asang Moso wa naonhaung" we' daga" na: na: li" nae".
  • 10 Ana" re: naonhaung" wa ngo re caung: da" nug: ra" nhag' myid bo: na shi: gemung: ngo Moso mae gyai ngaui bau" ra". Ai: nhag' myain" ra" myid wa lai: lo va" ayo, mae bo: na qere: maqo" caung: da" shi:
  • 11 ko". – Ceru: ein: ngo ta" ru wa ngo mae qug: khai: qhug' mung: lhau" ca" yang: ta" ru mangaid: . Ngo myao: qu" qhug' qu" va" agin akhyo: jham mae nhag' dag: na
  • 12 nae" tau: mho" xeim: yu: ra". – Myaung sho" ru rere: ngo ba: , magain: mago" qo" ru rere: ngo ba: . Ngo wa vae: gyi: ngaid qere: , myaung sho: ngaid qere: khoyo, khotau mae na na nhag' ba: dag: yu nae"
  • 13 khyo re xeim: zhao: yu: to: va". – Ngo re qam: o: we' byang" nhao: ra" Khristu khyo" yang ja: nam jab mau" re qo" aung
  • 14 va". – Ngaid qere: qug: khai: phau" ra" au: naonhaung" ngo we' zam" khug: ra" khyo"
  • 15 yang vintang: za: caung veko". – Philipi vo byu qe we" ngaui bau: lau dao: hau" qhid mung: Makedoni mae" ngo thug' nae" ein: seim" na: au: aung lam qhaug' ru , aung lam mho' ra" mau" mae naonhaung" mae" getau khophung: re: ngo we' mazam"
  • 16 makhug ko". – Thesaloni mae ngo na shi" au: ngo mae ca" qo ru naonhaung" shid'
  • 17 lhang lao" qhaug' ke' veko". – Ngo ceru: ein: mho: ru wa aung lam re qho nug: yang: ta" ru mangaid: . Naonhaung" min kyae: the' genae" tau: mae" ngo mho:
  • 18 ru angaid: . – Ana" au: aja: ja: ngo qo" ra" jo, nho" magain: mago" yao: ngaid: . Naonhaung" jhaung qhu" jham alhab' re Ephaphrodi lo, mae" ngo qo" yu va". Ai: jhaung qhu" jham wa sheim nae pyo" ra" xeim: , Moso khae: yu nug: ra" xeim: we'
  • 19 dakhyo: ngaid: ra". – Airu: mung: nga" Moso wa magain: mago" jo, nho" qo" yaug ngaid: ru we' dakhyo: Yesu Khristu khyo" yang naonhaung" qo ca" ra" gu: alhab' re
  • 20 byid' li" nae". – Ngonhaung" pho" ngaid: ra" Moso wa apyaid ato kho-nhae" re: phung bao bao: jo, veshao: wo"...Amen.
  • 21 Yesu Khristu mae shaogyang" ra" mo,
  • 22 re au" ke' ra". – Ngo we' daga" na ko" ra" mao: nhaung: qe wa naonhaung" re au" ke' ako". Siza: jhaung: zug' vang mae na ko" ra" shaogyang" ra" mo, wa gekai: lai au" ke' ako".
  • 23 Ngonhaung" Asang Yesu Khristu jeju wa naonhaung" alhab' mo, adao mae jo; na veshao: wo". Amen.
回到本卷目录 回到本版本目录 回到首页