1 Ji: dao: jham" khyo" yang Lapa Habaku' jhaung: mho' dao: kheim: jham wa .2 O" thain" madaui Mo"so we" ni" thoe the' gyo: yang: ngo gyaug va". Mo"so: we' ce: zin: khug mae bao: myhao" byid: la, nhag' khoqhi" yo: ngaid qere: nhag' myain: nae" jao: mae nhag' myain: byid: shi: la, .3 Mo"so wa Temain: mang: mae" shao gyang" ra" yaug wa Parain: bam mae" thug' joe" li" ra". Yao" phung bao wa mug: nyug lasung" re nghoe' gam mung: myid kin wa yao: re caung: khin" nae" akhyo byang" jo; li" nae".4 Yao" ave, wa ba bao ru" ru ngaid mung: yao" lo, mae" bo" bao bao: thug' mung: yao" phung bao wa ai: akhug mae ngaid: ra".5 Aqam" ayi wa yao" qhid' khyo ye" lo" mung: zu" ra" myi: gyoe: wa yao" khyid mae" thug' li" ra".6 Yao: ye, mung: myid gye, re ka" qu" ra". Yao: qu" ke' mung: labug: byu myu" qe re pyo: sin" ke' ra" thain" madaui jo; jo; ra" bam jham re byo; sin" lo" nhao: ra". Malam: lai: jo; ra" bug gaung jham goe; gyo" lo" ko" ra". Yao" gau: khyo jham wa apyaid ato ngaid: ra".7 Khushain: mang: mae" seim zaung jham qug: khai: qhug' ru . Midian: mang: myo, kyo" jham laui" lab: na: ru re ngo myao: ra".8 O" Mo"so AsAng wa khyaid' yu: ra" myao: lhin" re jui: nae" ayo, joe" sho' qid zang jham re nhag' yo" li" mung: qid dae jham re qu" gyid' na nae" i"?9 AsAng: byu myu" akaung ako' jham mae to" to" ra" dao: so: jo; ru we' dakhyo: lo, la: sin: re phoe' qhu" va" ra". Myid kin mae qid gyaung: jham re yug nhao mung: .10 Bam jham nao re myao yang: gyaug: nin" na: ako". Qid bug jham nghoe' gam: lo" mung: no; thao" ra" jo, qo wa myang: hau: na mung: yao" lo, re tau: yheim" ke' ra".11 Ni" bao qhi: ra" myo: khe' jham zin: lo" mung: qhid qhid bao: ra" lhae lhe' caid' ru: bao qhi: ra" mathao mae ba we' lho" wa yao" jo, qo mae thang: jo; ako".12 AsAng wa nhag' yo: yang: damang: geim" mae su" lhang: qin" mung: nhag' gyid' ru: yang byu myu" qe re zab: nhe" pye' ava".13 Xau gyain: khae: yu yaug ga" ra" ni" amyu" re khyaid' khyi: yu nae" tau: AsAng thug' li" lo: ava". Khang" dao: tarha" macao" ra" yaug: yham mae" au: re dae te' mung: apain mae" aphyo: joe" sho' khyaid' shao: pye' ava".14 Zug: qe: au: re myo" yang bag: kyao" pye' ra". Yao: bam wa ngo re ci: dao" lo" veshao: ga: aug' la re" ru: hug' nhao ko" ra". Masho: majhin: mo, re deim:so: zag kaid'nae" myid: yaung: to: mung: ngaui bau" na ko" ra".15 AsAng wa jui: myao: re jui: mung: vung vung ga: myang: hau: ra" qid dae gaung: khyo su" nao" ye" lo" ra".16 Ai: akhyo jham re ngo the' gyo: lao" sang: gaug: thaung" ra". Ai: thoe jham: yang o gag: byaug: ra". Sho: qug: sho: qae qeim" main" lo" ru ru: dagaung geim" ko, ko, nin" ra". Khoru: ein: re qug: khai: kyi" khyag' ba na joe" nae" we' phyo' qheim" nae" mo, wa nga" amyu" re se' jheim: nae" ba na ayo, joe" sho' Ngo na: dang ca" li" nae".17 Pho' ham" gae wa abu" mabu". Sabyi' naui mae ashi: mazaui: . Zhainlun: gae re myid: nghae: jao: majo, taung yo yothaung: wa qhovo: qhoshi: mazaui: . Yao khyae mae yao jham gain mung: nung: yham mae re: nung: nau" magai: na lo: nae".18 Ngaid qere: Mo"so mae ngo ngaui bau: mung: ngo re khyaid' yu: ra" Mo"so re khug ngha yang: nhag' jo, yo nae".19 AsAng Mo"so wa Nga" kheim: so' qam: o: ngaid: ra". Nga" khyid re cid phaug' khyid ru: boe" nhao yang: Ngo re myhao: ra" jo, qo mae su: nhao: ra".