1 Nineve" vo mo" we' tin: mung: ta" ra" Elakosha byu Nahum myo, myhung" dao: wa ceru ngaid: ra".2 Mo"so wa laui laui ba: lam" ru we' qobo dae qo" byid: yaug ngaid: ra". Mo"so wa nhag' gyid' ru we' qobo dae byid' ra". Mo"so wa gye kaid' ra" mo, re dae byid: mung: gye kaid' mo; dao mae myid: xam"3 ci: ra". – Mo"so wa nhag' myid qhang: ra". Phung bao kheim: so' re: qi" ra". Ngaid: qere: qobo qo" mo, re qobo mae" maloe, nhao ngaid: ra". Mo"so wa la sham" mae re: mug: qu la qam" mae re: joe" li" mung: jham thaui: jham wa yao" khyid gyo: mae4 thaui: lhag' ru: boe" byaug: ra". – Mo"so wa qid dae re mho" shid' yang: kin" lo" ra". Qid gyaung: zo: zang jham kyaug' ho: lo" ko" ra". Bashain: bam we' Khamela' bam wa nyhug' jhoe' lo" ko" ra". Lebanon: abu" jham re: kyaug' khao: lo" byaug ko" ra". –5 Yao" mathao mae bam mo" jham laui" nain" mung: bug gaung jham wa gyoe; gyo" lo" ko" ra". Myid gaung we' myid kin mae" na mae: na wa yao" qhid' kheim: mae daui6 lab: na: ako". – Yao: nhag' lam: laung: na: au: yao" qhid' kheim: mae khoyaug qo" ye, nae". Yao: nhag' gyid' ru re khoyaug qo" tam" genae". Yao: nhag' yo" ru wa myi: re" ru: laung mung: laung: mo" baui jham byi:7 sin: nhao: ra". – Mo"so wa gai shab: thao" yaug ngaid: ra". Qug: khai" ra" au: mae" khug ngha qo ngaid: ra". Khug ngha mo,8 alhab' mo; re yao: ba: na: ra". – Yao: wa Nineve" vo re qid khyaid' yang jheim" pye' nhao: mung: gye vo qe re mug: caid' khug khyo khe' pye' li" nae".9 Naonhaung" Mo"so re khoru: kaid' nae" juyi khyug' na ko". Yao: wa gain sho' jheim" pye' nhao: li" nae". Dalhang dam: lhau: nhaung" ru thug' lo: nae"10 mangaid: . – Yao: bam wa zau: re" ru yao: cao: jho" kyin: mung: sabyi' yhid re" ru: boe" mung: boe, said re" ru: myi: ngha" jheim" pye' ru qhug' genae" ngaid:11 ra". – Mo"so re magai: ra" shaid' khyo" tau: lhain: nae" tau: juyi khyug' nae" byul- haung byin qham cao: dayaug ni" akhug12 mae" thug' li" lo: ava". – Mo"so ceru: ga: mho: ra". Yao: bam qam: mo" bo mung: myo: laug gengaid yang: re: yao: bam jeim" gyoe; gyo" mung: baui" lo" byaug genae". Ngo nao re yhin" pyam" qu" ngaid qere: thao phyao: pyam" yhin" lo: nae"13 mangaid: . – A na" nao re yao: bam vhin: to" ra" kyau: re Ngo nag: khyug' mung: myag: taui" to" ra" taui: re re: lao" phyid' pye' nae".14 Thao phyao: ni" nyaug akaung maqo" xo' lo: nae" ga: Mo"so khang" to" ava". Kyaung" co' ra" alho we' sheim" yu: ra" alho re ni" pa" caung: yham mae" Ngo qab: khyo" pye' nae". Nao magai mashab mung: na: mathao mae ni" lab ngo kaid' nae".15 Gai: ra" lau dao: we' ngaui bau: yaug yo: khyo hau" kyo: yaug: khyid re bam dao mae qu" ge, . O: Yuda we" ni" poe jham re kaid' wa, ni" dao: so: qobo khyaid' wa, . makhyang: mashab yaug wa jeim" pye' mung: thao phyao: nao re qo" nghoe' lo: nae" mangaid: .