1 Ziun: bam dao mae labo" maid ge, . Shao gyang" ra" nga" bam dao mae" hug' peim" ke' ge, . Mang: byu qe gyaug: nin" geshao: . Khoru: ga" re Mo"so: ba na ayo,2 jhao" li" va". Ana" yao: joe" li" va". – Ai wa mug: caid' re" ru: caid' no; jo; ru we' nhag' qhid' jham thaui: mung: caid' no; ba na ngaid: ra". Bam jham mae ne, seim nhag' qhid' thab' re re" ru: myo: laug: ru we' qam: bo: ra" gye daja: joe" li" lo: ra". Ai wa qhid' phyao: maboe" qu" shi: . Thao phyao: re: zin na myo: sho' mae boe" zai3 mangaid: . – Yao: bam: qhid' au: mae myi: nga" na: ra". Yao: bam: thao mae re: myi: shae de; lo: ra". Yao: bam: qhid' au: mae" mang: din" wa Edin: khyae ru" ru ngaid mung: yao: bam lai: lo" thao cae: jhug tag boe" byaug: ra". Yao: bam: lo, khug mae" qo" phao: thug' loe; ru pe" majo, .4 Yao: bam: ve, lho wa myao: jham we' dau: ra". Yao: bam wa myao: jui: sulhe: qe re" ru: zam" byae byae: tao: ko" ra". –5 Myao: lhin" myang thoe ru: khofo nga" myang: na: ru ru: gye khe' jao: khyo to" ye" lo" ra" gye zo: qe ru: , bam gaung:6 mae thug' jhu" lhau ko" ra". – Yao: bam: qhid' kheim: mae mang: byu alhab' wa saung" myaung: dug: byaug ko" mung: yaug khao: ngo" myo, ma" byaug ko"7 ra". – Yao: bam wa sulhe: qe re" ru: tao: mung: gye khe' sulhe: qe re" ru: vokham" dao khyo do, lo" ko" ra". Khyo dae: madae: lo: dayaug: thao dayaug yain" ye" lo" ko"8 ra". – Dayaug we' dayaug majho" tha" thu: lang: lo: yaug khao: ngo" qhid' khyo9 din: din: za: yain" ye" ako". – Yao: bam wa vo khug mae tao" lhang: qin" ko" ra". Vokham" dao lhang" yang: yao: bam tao" qin" ko" ra". Yao: bam yham dao khyo do, mung: khug' mo; qe re" ru: bao: zo" kham: dung: khyo" qe, khug vao lo" ko" ra". –10 Yao: bam: qhid' kheim: mae myid gaung wa nain" ru we' mug: gaung wa laui" nin" na: ra". Ba we' lho" wa sham: lo" byaug11 mung: kyi jham re: mabao: lo". – Mo"so wa yao" gye jham: qhid' kheim: mae thoe mo" ke' ra". Yao" thoe tae" gyo: mo, gye phung: wa ajham ataung myo" laug: ra". AsAng: ba na wa qi" thao" ru we' gyaug: din ci" pho: ngaid: ra". Khoyaug wa qo" phao: loe, genae" i"?12 Mo"so ceru: ga: mho: ra". Zo: shaug' jao" mung: kaug' myain" qhu: thoe we'13 Ngo jhao" lhang: phaug' lo ge, . – Naon- haung" ve, mai bau: mangaid: . Gyug' main" ra" nhag' myid we' Mo"so jhao" lhang: lo ge, . Yao: wa nhag' myain" ru we' jeju byid' ra" nhag' myid , qobo dae byid: nae" tau: mae sang: no au ba: khyi" ru we' nhag' lam: atha" qo" myid bo yaug ngaid:14 ra". – Mo"so wa yao" nhag' myid lai" lo mung: naonhaung" re na gai gaug qo" jhaung: byid' lo: ngaid: re naonhaung" yao: re gaug zo: xeim: ngaui" xeim: qo" caung da" ngaui" genae".15 Ziun: bam mae" labo" maid ge, . Zo: shaug' jao" ayo, phag' ge, . Khai: ham16 phaung ge, . – Mang: byu qe dang: qhain: ge, . Volo mo, byu qe shao kyang" ge, . Ade, qe zang" ham ge, . Zoshao nug' nau" alhab' zhang: ge, . Pho" sag' wa yab qe, mae" myhi" sag' wa shaung yhaung" qe, mae"17 thug' li" geshao: . – Mo"so: mau" vin mo, khin jaung qe wa yham kheim: we' xeim: ngaui" phain: agyo: mae kaug' myain" qhui: thoe mung zo" re" AsAng we" ni" byu qe re nhag' khyag' la, . Su pe" yang ni" byu ngon- haung" Mo"so wa khai: mae na: i"? ga: se' da: be, khyaid' kaid' nae" danhao byid: la, .18 Mo"so wa mang: din" re amyid vho: mung: yao" byu qe re nhag' myain" ru we'19 khyaid' yu: li" nae". – Mo"so yao" byu qe re mho: ru wa qu" ge, . Gaug zo maui: lam: we' sabyi' Zhainlun: xau naonhaung" re byid' ke' mung: gyi: gyi: baug baug qhug' zo: genae". Getau: byumyu" yang naon- haung" re se' da: be, khyaid' ru qhug'20 genae" mangaid: lo:. – Qid meim shaid' mae" gye phung: re naonhaung" mae" va: khyo khe' sin" pye' nae". Yao" qhid' au: ba thug' shaid' qid dae khyo nhaung thao" ba vao shaid' qid dae khyo joe" sho' ai jham shid: bab: ru wa sheim nae sheim mo" daid ngaid nae". Khoru: ga" re Mo"so wa mau" mo" zaui" qhu" ru ngaid: li" nae".21 Mang: din" we" dagyaug daci". Ngaui bau: ngaui yao: na ge, . Gai gai: yao: Mo"so22 wa mau" mo" zaui: va". – Seyo mae" gug' nyhug' jham we" dagaung yug ge, . Gyo, zo: jao: nyug lao qam" lo va". Sag' gae jham wa ashi: zaui: mung: pho' ham" we' sabyi'23 naui jham gai: ma: li" veko" ra". – Ziun: mang: byu qe we" ngaui bau: ge, . Naon- haung" Mo"so mae pao yang: ngaui bau" na ge, . Yao: wa zin mug: we' la jham: re naonhaung" adao mae qu: sheim: byid'24 li" nae". – Zopao: jao: mae byang" mung: sabyi' pyag' jao: mae sabyi' we' xau byang"25 sheim: lo genae". – Naonhaung" jhao" Ngo nhao: ke' ra" Nga" gye phung: khyag' phaung" vang pang bothaung jham we' getau jhin khyag' jham zo" pye' ra" zin na ayo, jham naonhaung" re Ngo dam:26 byid: nae". – Naonhaung" wa zo: pho: myo: sho' qo" mung: gyi: gyi: baug baug qhug' zo: genae". Ai mung: naonhaung" tau: mug' pho: mau" kaid' yaug Mo"so re caung: khin" genae". Thao phyao: Nga" byu qe khonhae" re: qho' gyaug madam:27 phau: lo: genae". – Ngo Israel byumyu" qe: agaung: mae na: ru , naonhaung" Mo"so ngaid mung: getau khoyaug mana lo" ru re naonhaung" ba veko" mung: Nga" byu qe qho' gyaug dam: phau: lo: genae" mangaid: .28 Ai:thao mae mang: byu alhab' mo; dao mae Nga" Solo vhe' sheim: byid: nae". Ai mung: naonhaung" yaug gai zo: myiqe: zo: qe wa lapa pa genae". Phug' mao: qe yab mo, mo, genae". Pho" qae qe myo, myhung"29 myao: li" genae". – Ai: ba mae Nga" mau" zaui: mo, yaug gai myiqe: qe: dao mae30 Nga" Solo vhe' sheim: byid: nae". – Mug: gaung: mae re: myid gaung mae re: mug' pho: ngaid: ra" sa: , myi: shae , myi: khug'31 jham re Ngo qhu" nae". – Mo"so: gyaug pho" ra" ba na majoe" li" shi" au: ba wa cag' no, mung: lho" wa sa: boe" lo" nae". –32 Ai: ba mae Mo"so: mang re lao: yao mo, khag' ngaid qere: loe, genae". Khoru: ga" re Mo"so ta" to: va" ru we' dakhyo: Ziun: we' Yerusalem: vo mae loe, beim mo, na genae". Dang: na shi" ra" mo, mae Mo"so khyin: yu mo, bo genae".