1
Edom: mang: we' tin: mung: lapa Obadi' myo, myhung" myao: ru wa ,AsAng Moso: dao: thoe ngonhaung" the' gyo" bam va".Naonhanug" to" ye, mung: Edom: mang: re gye khe' nae" tau: ye" lo" ge,. Labug byumyu" qe jhao" logyo: nhao: ke' ava".2
Qu" wa, Nao re labug: amyu" qe: phaung mae myo, nho nga: khyoe' re qhug'3
li" nae". – Myhao: ra" jo, qo mae" laug khyaung mae khug: na mung: ngo re myid gaung khyo khoyaug qo" tau: khyo" pye' genae" ga: myid: na: ra" yaug ngaid mung: ni" ngaid beim" ru: yang nao re byo, qeim4
nhao: ava". – Nao wa zeim baung: re" ru: nao yao: ngaid beim: mung: kyi jham: dao mae said' re kaid' to: ngaid qere: ai: jo, qo mae" nao re ngo lao" phyid' khyo" pye' nae" ga: thain" madaui Moso mho: ra".5
Myi" mug: caid khug mae khug' mo; shae nhin" jham nao jhao" li" ko" ngaid: re yao: bam o: gu: za: yu: lo" genae" mangaid: i"? sabyi' shi: phyo' mo, li" qe re: shi: gyo"6
to: co' shi: genae" mangaid: i" ? – Nao wa saung" yao: byo, qeim: byaug venhaung i" ? Eso" wa xo sho' paui: pye' ru qhug' va" ra" i" ? Yao: nyham" shaung: to" ra" jo, nho"7
re qho: paui: myao vegenhaung i"?– Nao we' ba nam nam: to" ra" mo, wa nao re mug: kyo: joe" sho' khe' pye' veko". Ba nam kaid' to" ra" mo, wa nao re mhug' pyag' ang veko". Nao we' daga" lhaung" zo: lhaung" shaug' ra" mo, wa ni" nhae mae lha" thaung: khae: to: veko". Ni" laba lajhao8
gain: ava". – Thain" madaui Moso ta" ru kam wa Ai: ba na ayo, mae Edom: mang: mae" juyi ba mo, re re: Eso" nho: bam dao mae" au: naug: so zo: du" ra" mo, re re: ngo9
phyo' she: lhaui" pye' nae".– Te:main: vo mo" we" Eso" nho: bam mae" alhab' mo, re phyo' se' pye' nae" tau: mae ni" sulhe: qe gyaug vae: li" genae".10
Nao wa ni" nhaung: Yaku' re se' da: be, khyaid' kaid' ra" qo bo: mathao mae nao yao: qho' phau: mung: apyaid ato mae byo;11
baui" lo" li" nae". – Nao wa geshaid' khyo lhang: ye; ra" ba na gemang: mae" byu bang" jham: yang yao" gye phung: jham re sham" tai: lo" ra" ba na labug: amyu" qe yao" vokham" kham: khug khyo vao mung: Yerusalem: re pha" khyo" ra" ba na mae nao wa bomyid vang" ra" yaug ngaid:12
ra". – Ni" nhaung: byu bang" boe" ra" ba na mae yao"akhyo re daqu" ngaui Yuda, zo: myid: qe byo; baui: lo" ra" ba na mae nao dabau" nghao". Yao: bam qug: khai: kyi" khyag' thaung" qhug' ra" ba na mae13
nyhe'dao: dajhau.– Nga" byu jham qug: khai: kyi" khyag' qhug' ra" ba na mae yao: bam: kyae" kham: khug khyo magai: vao. Yao:bam qug: khai: kyi" khyag' qhug' ru re magai: qu". Ai: ba mae yao: bam: zai yo re14
lo, magai: ye: tin: . – Phao: loe; lo" ra" yao" byu qe re tam" kyo" nae" tau: khyo kao: no:qo mae daye: ye; jo, . Qug: khai: kyi" khyag' qhug' ru mae" dang shi" ra" mo, re danyhang" qhaug' pye' .15
Khoru: ga" re Moso: ba na ayo, labug: byumyu" alhab' dao mae joe" li" na va". Nao kaid' ru we' dakhyo: su pe" yang nao re kaid' li" genae". Ai ru" ra" mau" zo"16
wa ni" au: dao mae joe" li" nae". – Yuda byumyu" qe wa shao gyang" ra" nga" bam dao mae zo: shaug' ko" ru we' dakhyo: avai: ayae mae na: ra" labug: amyu" alhab' bam: re: zo: shaug' li" genae".17
Ziun: bam dao mae loe; beim: ra" mo, daqhae: khug ngha: na: li" genae". Ai wa shao gyang" ra" mug: myid ngaid: li" nae". Yaku' nyaug bao: wa yao: yao: sang ang: ra"18
mug: myid re sang: yu: li" genae".– Yaku' amyu" wa myi: Yoseb' amyu" wa myi: she Eso" amyu" wa boe, said boe" mung: madang lo: sho' nga" jeim" lo" li" genae"19
ga: Moso mho: ava". – Mug: za: shaid' mae" mo, wa Eso" bam re Jao: dae mae" Philisti mang: re sang: li" genae". Yao: bam wa Ephrim: din" we' Samari' din" re sang: li" genae". Binyamin: amyu" qe wa Giled'20
mang: re sang: yu: li" genae". – Sham" tai: lo" qhug' mung: Khanain: byu qe: phaung mae bona: ra" Israel amyu" ajham ataung wa Zarephaid: vo mo" joe" sho' sang: yu: li" genae". Sephared' mae na: ra" Yerusalem: vo mo" byu qe wa mug: za: shaid' mae" vogaung: jham re sang: yu: li" genae".–21
Eso" bam re dao: phyid' nae" tau: khyaid' yu nae" mo, wa Ziun: bam khyo do, genae". Mang: din" jham re: Moso: mang: din" boe" lo" li" nae".